Thursday, July 29, 2010

கிளி ஜோதிடம்

மருதமலை படிகளில் இறங்குகையில் பார்த்தேன்.
ஐந்தாறு கிளி ஜோசியக்காரர்கள் இருந்தார்கள்.
“சரவணன் B.A” என்று அட்டை வைத்திருந்தவரைத் தேர்ந்தெடுத்து அமர்ந்தேன்.
(கற்றோருக்கு சென்ற இடமெல்லாம் சிறப்பு என்பதறிக)
என் பெயருக்கு கிளி எடுத்த சீட்டில் இரட்டைப்பாம்பு படம் வந்திருந்தது.
[caption id="attachment_440" align="alignright" width="300" caption="கிளி ஜோதிடம்"]கிளி ஜோதிடம்[/caption]எனக்கு நாகதோஷம் இருக்கிறது.
திருமணம் தடைபட்டுக்கொண்டே இருக்கும்.
மணவாழ்க்கையும் மனம்போல அமையாது.
கோபுரம் இடிந்த காளஹஸ்தியில் தோஷ நிவர்த்தி பூஜை செய்யவேண்டும்.
ஒன்பது வெள்ளிக்கிழமை பாம்புக்கு பால் வைக்க வேண்டும்.
தகவல்களைக் கொட்டிவிட்டு பத்து ரூபாயைக் கொத்திக்கொண்டார் சரவணன் B.A
எனக்கு பிடிக்கவேயில்லை.
இன்னொரு பத்து ரூபாயைக் கொடுத்து மீண்டுமெடுக்க சொன்னேன்.
இம்முறை மன்மதன் படம் வந்திருந்தது.
எனக்கு காதல் திருமணம் தான் நடக்குமாம்.
ரதி போல மனைவியாம்.
மகிழ்ச்சியான மணவாழ்க்கையாம்.
சரவணன் சொல்லிக்கொண்டேப் போக எனக்கு குழப்பமாயிருந்தது.
கிளியைப் பார்த்தேன்.
ரதி முகமும் பாம்பு உடலுமாய்க் கூண்டுக்குள் இருந்தது…
கண்காட்சியில் பார்த்த நாகக்கன்னியைப் போல!